Esperante Adoru

Esperanto Unua paĝo || A - Z | Adoru | Biblio | Breviero | Meslibro | Traktatoj | Trezorejo | | | |

Ĉu ... preĝi | mediti | ricevi instigojn || kanti | muziki || informiĝi | legi | studi || prepari Diservon



printebla versio
Strukturo de la Breviero

Horo de la Legaĵoj


Breviero > Ordinara Tempo > Kvar-semajna Psalmaro > Tria Semajno > Mardo > Horo de la Legaĵoj


MALFERMO


(nur, se oni ne ĵus preĝis la Invitatorion)

Dio, atentu helpi min.

Rapidu subteni min. – kp. Psa 70 (69), 2

Gloro al la Patro kaj al la Filo kaj al la Sankta Spirito,

kiel en la komenco, tiel nun kaj ĉiam kaj en eterno. Amen. Haleluja.


HIMNO


nokte aŭ frumatene:

Consors paterni luminis


Ho Krist', kunul' de l' Patra lum',
Vi mem de l' lumo lum' kaj tag',
la nokt-mallumon rompas ni
per kantoj, petegante Vin.

Tenebrojn prenu el la mens',
demonajn bandojn ĉasu for,
nin liberigu de dormem';
pigrem' ne superŝutu nin.

Tiele Vi indulgu, Krist',
al Via tuta fidular',
kaj kion himne kantas ni
per psalmoj, tion donu Vi.

Al Vi, ho Krist', plej pia Reĝ',
kun Via Patro, estu glor',
kaj kun la Sankta Paraklet',
tra ĉiu tempo, en etern'. Amen.

latina T: Ambrozio el Milano (340-397) • E: Albrecht Kronenberger 2008

tage:

O sacrosancta Trinitas


Ho Vi, plej sankta Triunu',
Vi, ĉies fonto kaj struktur',
la tagon donis por labor',
la nokton por ripoz' al ni.

Matene kaj vespere ni
prikantas Vin, dum nokt' kaj tag'.
Tra ĉiu temp' de nia viv'
konservu nin en Via glor'.

Servantoj Viaj tie ĉi
kunvenis por adori Vin,
por ligi siajn preĝojn kun
la himnoj de l' ĉiela ĥor'.

Al Di', la Patro, estu glor',
al Kristo, Lia sola Fil',
kaj al la sankta Paraklet',
tra ĉiuj tempoj, en etern'. Amen.

latina T: anonima • E: Peter Langenecker kaj Albrecht Kronenberger 2005

PSALMODIO


Unua Antifono


¶ Leviĝas Dio,
for-kuras Liaj malamantoj for de Li.

Unua Psalmo – Psa 68 (67), 2-11


Leviĝu Dio, disĵetiĝu Liaj malamikoj, *
kaj for-kuru Liaj malamantoj for de Li.

Kiel dispeliĝas fumo, *
tiel Vi ilin dispelu;

kiel vakso fandiĝas de fajro, *
tiel pereu la malvirtuloj antaŭ Dio.

Sed la virtuloj ĝojos, / gajos antaŭ Dio, *
kaj triumfos ĝojege. ¶

Kantu al Dio, / muziku al Lia nomo, *
gloru la veturantan sur la nuboj;

Lia nomo estas JAH; *
ĝoju antaŭ Li.

Patro de la orfoj kaj juĝanto de la vidvinoj *
estas Dio en Sia sankta loĝejo.

Dio donas domon al soluloj, / elirigas malliberulojn en liberecon; *
nur la ribeluloj restas en dezerto. ¶

Ho Dio, kiam Vi iris antaŭ Via popolo, *
kiam Vi paŝis en la dezerto,

la tero tremis kaj la ĉielo fandiĝis *
de la vizaĝo de Dio,

tiu Sinaj tremis de la vizaĝo de Dio, *
Dio de Izrael.

Bon-faran pluvon Vi verŝis, ho Dio, sur Vian heredon, *
kaj kiam ĝi perdis la fortojn, Vi ĝin vigligis.

Via gento ekloĝis tie; *
Vi pretigis per Via boneco ĉion por la malriĉulo, ho Dio. ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Unua Antifono


¶ Leviĝas Dio,
for-kuras Liaj malamantoj for de Li.

Dua Antifono


¶ Dio estas por ni Dio de savo,
kaj la Eternulo, mia Sinjoro, savas de la morto.

Dua Psalmo – Psa 68 (67), 12-24


Mia Sinjoro elparolas vorton; *
kaj grandega estas la nombro de la anoncantinoj.

Reĝoj de armeoj for-kuras, for-kuras; *
kaj la hejme-sidantino dividas akiron.

Kiam vi kuŝas inter brutejoj, / la flugiloj de kolombo estas kovritaj de arĝento, *
kaj ĝiaj plumoj de brilanta oro.

Kiam la Plej-potenculo dismetis reĝojn sur la tero, *
ĝi brilis kiel neĝo sur Calmon. ¶

Monto de Dio estas la monto Baŝana, *
monto multe-pinta estas la monto Baŝana.

Kial vi, montoj multe-pintaj, envie rigardas la monton, / kiun Dio elektis, por sidi sur ĝi, *
kaj sur kiu la Eternulo loĝos eterne?

Da veturiloj de Dio ekzistas multaj miloj da miloj; *
inter ili estas mia Sinjoro sur la sankta Sinaj.

Vi supreniris alten, *
alkondukis kaptitojn,

prenis donacojn de homoj, *
kaj eĉ ribeluloj povas loĝi ĉe la Eternulo, la Dio. ¶

Glorata estu mia Sinjoro, / ĉiutage Li zorgas pri ni; *
Dio estas nia savo.

Dio estas por ni Dio de savo, *
kaj la Eternulo, mia Sinjoro, savas de la morto.

Jes, Dio frakasas la kapon de Siaj malamikoj, *
la multe-haran kranion de tiuj, kiuj obstinas en siaj pekoj.

Mia Sinjoro diris: / El Baŝan Mi al-kondukos, *
Mi al-kondukos el la profundeco de la maro;

por ke vi trempu vian piedon en sango, *
kaj la lango de viaj hundoj ĝuu de viaj malamikoj. ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Dua Antifono


¶ Dio estas por ni Dio de savo,
kaj la Eternulo, mia Sinjoro, savas de la morto.

Tria Antifono


¶ Regnoj de la tero, kantu al Dio,
muziku al mia Sinjoro.

Tria Psalmo – Psa 68 (67), 25-36


Oni vidis Vian iron, ho Dio, *
la iron de mia Dio, mia Reĝo, en la sanktejo.

Antaŭe iris kantistoj, / poste kord-instrumentistoj, *
en la mezo de knabinoj tamburinistinoj.

En la kunvenoj gloru Dion, mian Sinjoron, *
vi, devenantoj de Izrael.

Tie estas Benjamen, la plej juna, ilia reganto; / la princoj de Jehuda kaj iliaj amasoj; *
la princoj de Zebulun kaj de Naftali. ¶

Via Dio destinis vian forton. *
Fortikigu, ho Dio, tion, kion Vi faris por ni.

Pro Via templo en Jerusalem *
la reĝoj alportos al Vi donacojn.

Kvietigu la beston en la kanoj, / la aron da bovoj kun la bovidoj, *
popoloj, kiuj humiliĝas pro pecoj da arĝento.

Li dispelas la popolojn, *
kiuj deziras batalojn. ¶

Venos eminentuloj el Egiptujo; / Etiopujo rapidos, *
por etendi siajn manojn al Dio.

Regnoj de la tero, kantu al Dio, *
muziku al mia Sinjoro,

kiu regas en la ĉielo de la eternaj ĉieloj. *
Jen Li tondras per Sia voĉo, forta voĉo.

Gloru la forton de Dio! / Super Izrael estas Lia majesto, *
kaj Lia potenco estas en la nuboj.

Timinda Vi estas, ho Dio, *
en Via sanktejo.

Li estas la Dio de Izrael, / Li donas forton kaj potencon al la popolo. *
Glorata estu Dio. ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Tria Antifono


¶ Regnoj de la tero, kantu al Dio,
muziku al mia Sinjoro.

VERSIKLO


Mi aŭdu, kion diras Dio, la Eternulo.

Li deklaros pacon al Sia popolo. – Psa 85 (84), 9

VORTO DE DIO


Legaĵoj kun Responsorioj kiel en la Propraj Partoj

PREĜO


kiel en la Propraj Partoj

FINA VOKO


Ni benu la Eternulon.

Al Dio estu danko.


supren al la komenco de la paĝo