Esperante Adoru

Esperanto Unua paĝo || A - Z | Adoru | Biblio | Breviero | Meslibro | Traktatoj | Trezorejo | | | |

Ĉu ... preĝi | mediti | ricevi instigojn || kanti | muziki || informiĝi | legi | studi || prepari Diservon



printebla versio
Strukturo de la Breviero

Horo de la Legaĵoj


Breviero > Ordinara Tempo > Kvar-semajna Psalmaro > Dua Semajno > Vendredo > Horo de la Legaĵoj


MALFERMO


(nur, se oni ne ĵus preĝis la Invitatorion)

Dio, atentu helpi min.

Rapidu subteni min. – kp. Psa 70 (69), 2

Gloro al la Patro kaj al la Filo kaj al la Sankta Spirito,

kiel en la komenco, tiel nun kaj ĉiam kaj en eterno. Amen. Haleluja.


HIMNO


nokte aŭ frumatene:

Galli cantu mediante


Baldaŭ sonos koko-krio,
nokto-mezo estos for,
kun la nigra nokt-profundo
cedos timo kaj angor'.
Tial ni Vin surgenue,
Dio, petas pri favor'.

Ĉiujn homojn Vi protektas,
estas lum', potenc' kaj fort',
dum en plena nokt-silento
dormas ni sen ajna vort',
kaj, ĉar ni senmove kuŝas,
nia dormo ŝajnas mort'.

Kristo, Vi nin ĉiujn vekos
el la dormo de l' malbon',
nin de l' nokto liberigos
grace, kvazaŭ el prizon',
pridonacos nin per lumo,
ĉi viviga Dia don'.

Estu laŭd' al Di', la Patro.
Vin, Di-Fil', adoras ni.
Kaj la sanktan Di-Spiriton
en etern' honoras ni.
Paco, vivo, lumo, ĉio!
Vin, Triunu, gloras ni. Amen.

latina T: Gottschalk Fuldensis OSB († ĉ. 869) • E: Peter Langenecker kaj Albrecht Kronenberger 2005

tage:

Adesto, rerum conditor


Al ni asistu, ho Kreant',
asistu, glor' de l' Patra lum';
se mankus Via grac' al ni,
ni devus tremi de angor'.

Vin mem ni portu, Di', en ni,
kaj Via Spir' plenigu nin;
do por la fraŭdo de l' Rabant'
ne estos spac' en nia kor'.

Kaj inter la profana far',
al kiu urĝas nin la viv',
liberaj ni de ajna krim'
persistos, Di', laŭ Via vol'.

Al Vi, ho Krist', plej pia Reĝ',
al Vi, ho Patro, estu glor',
kun Via Spir', la Paraklet',
jarcentojn, -milojn, en etern'. Amen.

latina T: antaŭ 6a jarcento • E: Peter Langenecker kaj Albrecht Kronenberger 2005

PSALMODIO


Unua Antifono


¶ Ne en Via kolero min riproĉu, ho Eternulo.

Unua Psalmo – Psa 38 (37), 2-5


Ho Eternulo, ne en Via kolero min riproĉu, *
kaj ne en Via furiozo min punu.

Ĉar Viaj sagoj penetris en min, *
kaj pezas sur mi Via mano. ¶

Ekzistas neniu sana loko en mia korpo pro Via kolero, *
nenio sendifekta ekzistas en miaj ostoj pro mia peko.

Ĉar miaj krimoj superas mian kapon; *
kiel peza ŝarĝo, ili estas tro pezaj por mi. ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Unua Antifono


¶ Ne en Via kolero min riproĉu, ho Eternulo.

Dua Antifono


¶ Ho Eternulo, antaŭ Vi estas ĉiuj miaj deziroj.

Dua Psalmo – Psa 38 (37), 6-12


Malbon-odoras kaj pusas miaj ulceroj *
pro mia malsaĝeco.

Mi kurbiĝis kaj kliniĝis treege, *
la tutan tagon mi iras malgaja. ¶

Ĉar miaj internaĵoj estas plenaj de brulumo, *
kaj ne ekzistas sana loko en mia korpo.

Mi tute senfortiĝis kaj kadukiĝis, *
mi kriegas pro malkvieteco de mia koro. ¶

Mia Sinjoro, antaŭ Vi estas ĉiuj miaj deziroj, *
kaj mia ĝemo ne estas kaŝita antaŭ Vi.

Mia koro tremegas, / forlasis min mia forto; *
kaj eĉ la lumo de miaj okuloj ne estas ĉe mi. ¶

Miaj amikoj kaj kamaradoj *
repaŝis pro mia pesto,

kaj miaj proksimuloj *
stariĝis malproksime. ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Dua Antifono


¶ Ho Eternulo, antaŭ Vi estas ĉiuj miaj deziroj.

Tria Antifono


¶ Mi konfesas mian kulpon.
Ne forlasu min, ho Eternulo, mia helpo.

Tria Psalmo – Psa 38 (37), 13-23


Kaj insidis kontraŭ mi tiuj, kiuj celas mian vivon, / kaj miaj malbon-dezirantoj parolas pri mia pereo, *
kaj malicojn ili pripensas ĉiutage.

Kaj mi estas kiel surdulo kaj ne aŭdas; *
kiel mutulo, kiu ne malfermas sian buŝon.

Mi estas kiel homo, kiu ne aŭdas *
kaj kiu ne havas en sia buŝo reparolon. ¶

Sed al Vi, ho Eternulo, mi esperas; *
Vi aŭskultos, mia Sinjoro, mia Dio.

Ĉar mi diris: Ili povus ĝoji pri mi; *
ili fanfaronus pri mi, kiam mia piedo ekŝanceliĝus.

Ĉar mi estas preta fali, *
kaj mia sufero estas ĉiam antaŭ mi.

Ĉar mi konfesas mian kulpon; *
kaj min ĉagrenas mia peko. ¶

Kaj la malamikoj de mia vivo estas fortaj, *
kaj multaj estas miaj senkaŭzaj malamantoj.

Kaj tiuj, kiuj pagas al mi malbonon por bono, *
atakas min pro tio, ke mi celas bonon. ¶

Ne forlasu min, ho Eternulo; *
mia Dio, ne malproksimiĝu de mi.

Rapidu, por helpi min, *
mia Sinjoro, mia helpo! ¶

Gloro al la Patro kaj al la Filo *
kaj al la Sankta Spirito,

kiel en la komenco, tiel nun kaj ĉiam *
kaj en eterno. Amen.

Tria Antifono


¶ Mi konfesas mian kulpon.
Ne forlasu min, ho Eternulo, mia helpo.

VERSIKLO


Mia animo avidas Vian savon.

Miaj okuloj avidas Vian vorton. – Psa 119 (118), 81a.82a

VORTO DE DIO


Legaĵoj kun Responsorioj kiel en la Propraj Partoj

PREĜO


kiel en la Propraj Partoj

FINA VOKO


Ni benu la Eternulon.

Al Dio estu danko.


supren al la komenco de la paĝo